محمد بخشي اؤز ترجمه حاليندا بئله يازير (بيوگرافي استاد ميرزامحمد بخشي)
"متوسط ايکينجی بير خانواده ده 1308نجی ايلده اهرين ورزقان بخشی نين يوز ائولی ديزج صفرعلی کندينده دنيايه گوز آچديم.
آتام منيم آديمی محمد قويدو يئددی ياشيندا ايديم کی ورزقاندا اولان تکجه بير ابتدائی مدرسه يه يوللانديم.
مدرسه ده ياخشی نمره لر آليرديم وهميشه معلم لرين تشويقی ايله اوز به اوز اولوردوم.
ياواش- ياواش اطرافيمدا اولان شئی لردن و منظره لردن اعتناء سيز کئچميرديم ابتدائی نين اوچونجو کلاسيندا ايديم کی شعره طرف چکيلديم.
اولده داغ – داشين و طبيعتين وصفينده قوشمالار يازيرديم و سونرا اجتماعی و ادبی شعرلر يازماغا باشلاديم،چاليشيرديم کی ادب پرور انسانلارلا گوروش ائله ييم تا بو يول ايله بيليگيمه آرتيريم.
اونون طبعينی سيناماق اوچون احساسلی بير شعرين نمونه اوچون بوردا يازيريق:
تئل اولسون
دوستوم بيرگون دئدی بيرسفريم وار
همسفرلر گره ک اهل دل اولسون
ادبلی اگلشين ادبلی دورسون
ايستر آرخاسيندا دوران ائل اولسون
چيخاق بير داغلارا دره ک گول چيچک
طبيعت ائله ميش داغلارا بزه ک
شرف دن دانيشاق،انسانی گزه گ
بولبول چهچهه وورسون باغلار گول اولسون
قوناقيم وار شعر و سخن استادی
دانيشيغيندا وار سوزونون دادی
شعرلری ياتانلاری اويادی
ايسته ر ياتان کاهل اولسون وئل اولسون
مقصد "اهريميزدير" گوزل باغی وار
آرازدان اويانا قانلی ياغی وار
دئييرلر داغلاردا آوو آياغی وار
گزيرلر هئی دومان اولسون يئل اولسون
داغلاردا اوخويور چولون قوشلاری
گويه باش قالديريب توت آغاجی
گول چيچک آچيبدير يارياماجلاری
دره لردن شر- شر آخان سئل اولسون
طبيعت اوغلويام سئوه ره م مهمان
انسان گره ک اولسون واقعده انسان
"بخشی" آرزو ائديرم مدام خدادان
صبا اسسين دالقالانان تئل اولسون
منبع كتاب ادبيات اوجاقي
(همکار ماهنامه ی عصر آدینه)